АСТАНА. KAZINFORM — Қазақстандық теннисші Сандуғаш Кенжебаева жұптық сында Мааньшань (Қытай) ITF W15 турнирінің финалында өнер көрсетті.
Шешуші бәсекеде қазақстандық спортшы ресейлік Софья Лансеремен бірге турнирдің 2-ракеткалары, таилық Пеангтарн Плипуек — қытайлық Цзяци Ванмен чемпиондық атақты сарапқа салды.
Кенжебаева С.Лансеремен бірге мамыр айында осы додада чемпион атанған еді. Бұл жолы тартысты өрбіген бірінші партияда қазақстандық-ресейлік жұп тай-брейкте табандылық танытты – 7:6 (8:6).
Екінші сетте таилық-қытайлық дуэт есе қайырды - 6:4. Содан кейін супер тай-брейкте сәтті ойнады - 10:4.
Финалдық матч екі сағатқа жуық уақытқа созылды.
Еске сала кетейік, бұдан бұрын Сандуғаш Кенжебаеваның Қытайдағы турнирдің финалында ойнайтынын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).