АСТАНА. ҚазАқпарат - Қазақстандық Ярослава Шведова Майами (АҚШ) турнирінің бірінші айналымында кезінде әлемдік рейтингте көш бастаған сербиялық белгілі теннисші Елена Янковичпен кездесіп, 4:6, 6:4, 7:6 (7:3) есебімен жеңіске жетті, деп хабарлайды «ҚазАқпарат» ХАА тілшісі.
Сhampionat.com сайтынан алынған мәліметке қарағанда, 2 сағат 29 минутқа созылған аса тартысты кездесуде Ярослава қарсыласы матчболға ойнаған кезде де берілмей, өз шеберлігін көрсете білді. Бәрі де тай-брейкте шешіліп, Янкович үш рет қателік жіберіп, өз мүмкіндігін пайдалана алмады.
Ярослава Шведова биыл қатарынан сегіз жеңілістен кейін алғашқы ұтысына қол жеткізіп отыр. Енді ол екінші айналымда осы турнирдің 17-інші ракеткасы болып тіркелген ресейлік Анастасия Павлюченковамен шеберлік байқасады.
Айта кетейік, жүлде қоры 7 млн. АҚШ долларына жуықтайтын турнирде Қазақстанның бірінші ракеткасы Юлия Путинцева бірден екінші айналымнан бастап, германиялық Карина Виттёфтпен кортқа шығады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).