НҰР-СҰЛТАН. ҚазАқпарат – Қазақстандық Тимофей Скатов Италиядағы Розето-дельи-Абруци челленджер турнирінің ширек финалына шықты, деп хабарлайды ҚазАқпарат тілшісі.
Қазақстан теннис федерациясы мәлім еткеніндей, қазақстандық спортшы бастапқы екі кездесуін сәтті өткізді.
Т.Скатов алдымен германиялық Эльмар Эюповичпен кортқа шығып, 3 сағат 20 минутқа созылған тартысты матчта қарсыласын 2:6, 7:6 (7:1), 6:2 есебімен тізе бүктірді.
Қазақстандық теннисші екінші айналымда португалиялық Жоао Домингештен 7:6 (7:5), 6:2 есебімен басым түсті. Екі сағаттай уақытқа созылған бәсеке барысында ол 14 брейк-пойнттың алтауын пайдалана білді.
Дүниежүзілік рейтингте 221-орында тұрған 21 жастағы Т.Скатов жарыстың жартылай финалына шығу үшін ертең әлемнің 177-ракеткасы, италиялық Флавио Коболлимен таласады.
Еске сала кетейік, бұдан бұрын Михаил Кукушкиннің Индиан-Уэллсте негізі турнирге жолдама алғанын, Қазақстан – Германия матчы елордада өтетінін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).