НҰР-СҰЛТАН. ҚазАқпарат – Қазақстандық Тимофей Скатов елордада өтіп жатқан Forte Challenger 125 турнирінің екінші айналымына шықты, деп хабарлайды ҚазАқпарат тілшісі.
Т.Скатов бастапқы кездесуін отандасы Дмитрий Попкомен өткізді.
Д.Попко дүниежүзілік рейтингте 183-орында болса, 20 жастағы Т.Скатов 456-сатыда еді.
Бірінші партия барысында қарсыластар брейк алмасумен болды. Дегенмен есеп 4:3 болған мезетте Т.Скатов өз геймін ала білді. Содан кейін бір сағатқа созылған тартысты сетті өз пайдасына шешті.
Тимофей екінші сетті де брейкпен бастады – 2:0. Д.Попко таразы басын теңестіргенімен, Т.Скатов қайта алға шықты – 4:2. Ақыры ол екінші матчболын сәтті пайдалана алды – 6:4.
Бәсеке 1 сағат 53 минутқа созылды.
Т.Скатов ширек финалға шығу үшін рейтингте 171-сатыдағы аустриялық Себастиан Офнермен таласады. Ол бастапқы кездесуінде әлемнің 127-інші, осы доданың 6-ракеткасы, ресейлік Евгений Донскойды 6:2, 6:4 есебімен тізе бүктірді.
Еске сала кетейік, бұдан бұрын А.Бубликтің рейтингіде 43-орынға көтерілгенін, Нұр-Сұлтан 2 турнирінің қазақстандықтар үшін сәтсіз өтіп жатқанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).