НҰР-СҰЛТАН. ҚазАқпарат - Қазақстандық Тимофей Скатов Уругвайдағы Монтевидео челленджер турнирінің екінші айналымына шықты, деп хабарлайды ҚазАқпарат тілшісі.
Қазақстан теннис федерациясы мәлім еткеніндей, дүниежүзілік рейтингте 262-орында тұрған Т.Скатов алғашқы айналымда әлемнің 140-ракеткасы, чилилік Алехандро Табиломен кездесті.
Бірінші партия барысында Табило қатты қарсылық көрсетті. Дегенмен брейк жасап, сет-пойнтты пайдалана білген қазақстандық теннисші басымдық танытты - 6:3.
Екінші сетте Тимофей алға кетті - 3:0. Алехандро есепті қысқартты - 4:5. Әйтсе де Скатов матчты тағы бір брейкпен тәмамдады - 6:4.
Т.Скатов ширек финалға шығу үшін әлемнің 130-ракеткасы, боливиялық Уго Дельенмен таласады.
Еске сала кетейік, бұдан бұрын Елена Рыбакинаның әлемдік рейтингіде рекордтық көрсеткішке қол жеткізгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).