АСТАНА. ҚазАқпарат - Бүгін Францияның ашық чемпионаты «Ролан Гаррос» турнирінде рейтингте 12-інші орындағы қазақстандық Ярослава Шведова мен австралиялық Кейса Деллакуа жұбы финалда чехиялық Люси Шафаржова мен американдық Бетани Маттек-Сэндспен (7-інші ракетка) күш сынасты.
Қазспорт арнасынан тікелей эфирде көрсеткеніндей, бірінші партияда Я.Шведова мен К.Деллакуа бірнеше брейкке қол жеткізіп, 6:3 есебімен жеңіске жетті. Тартысты өткен екінші партияны брейк-пойнттардың бірін сәтті пайдаланған чехиялық пен американдық теннисші 6:4 есебімен ұтты.
Үшінші, шешуші партияда қос бірдей брейк жасаған Л.Шафаржова мен Б.Маттек-Сэндс 6:2 есебімен қарсыластарын тізе бүктіріп, турнирдің жеңімпазы атанды.
Биыл тәжірибелі жұптардың бірінен саналатын Л.Шафаржова мен Б.Маттек-Сэндс Австралия ашық біріншілігінде де чемпиондық атаққа қол жеткізген болатын.
Еске сала кетейік, әйелдер арасында жекелей сында финалда осы Л.Шафаржованы жеңген атақты американдық, әлемнің бірінші ракеткасы Серена Уильямс осы турнирдің үш мәрте жеңімпазы атанды. Сонымен қатар ол «үлкен дулыға» жарысын осымен жиырмасыншы рет ұтып отыр.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).