АСТАНА. ҚазАқпарат - Қазақстанның бірінші, әлемнің 61-інші ракеткасы Юлия Путинцева АҚШ-тың Чарльстон қаласында өтіп жатқан халықаралық турнирдің үшінші айналымына шықты.
Сhampionat.com сайтының хабарлауынша, Юлия екінші айналымда осы турнирдің 15-інші, әлемнің 51-інші ракеткасы, германиялық Сабина Лисицкиді аса тартысты матчта 7:5, 4:6, 6:3 есебімен тізе бүктірді. Ал дүниежүзілік рейтингте 70-інші сатыда тұрған Ярослава Шведова осы турнирдің бесінші, әлемнің 20-сыншы ракеткасы, атақты италиялық Сара Эрраниға еш қайран қыла алмай, 1 сағат 8 минутта 0:6, 3:6 есебімен жеңіліс тапты.
Чарльстон жарысында Қазақстаннан жалғыз қалған Юлия Путинцева үшінші айналымда америкалық теннисшілер Элисон Риске мен атышулы Серенаның апасы, осы турнирдің 3-інші ракеткасы Винус Уильямстің қай жеңгенімен кездеседі.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).