АСТАНА. ҚазАқпарат - Мельбурн қаласында басталған теннистен Австралия ашық чемпионатында қазақстандық Юлия Путинцева күтпеген жерден әлемнің бұрынғы бірінші ракеткасы, даниялық Каролина Возняцкиді ұтып кетті.
Қазіргі кезде дүниежүзілік рейтингте 18-інші орында келе жатқан, осы турнирдің 16-ыншы ракеткасы болып тіркелген К.Возняцки күткендегідей бірінші партияны аса сәтті өткізіп, әлемдік сатыда 76-ыншы сатыда тұрған Ю.Путинцеваны 6:1 есебімен жеңді. Әйтсе де аса тартысты өткен екінші партияда қазақстандық теннисші таразы басын өзіне аудара білді. Сөйтіп тай-брейкте атақты қарсыласынан 7:3 есебімен басым түсті. Шешуші, үшінші партияда да Ю.Путинцева жеңіске деген жігері мен шеберлігін таныта біліп, 6:4 есебімен тура үш сағат 15 минутқа созылған кездесуге әдемі нүкте қойды.
Сөйтіп К.Возняцки өз спорттық өмірінде алғаш рет Австралия ашық чемпионатының екінші кезеңіне өте алмады. Ал Ю.Путинцеваның келесі қарсыласы - қытайлық Хань Синьюнь.
Еске сала кетейік, ертең Мельбурн кортына Қазақстаннан Зарина Дияс пен Ярослава Шведова және ерлер арасында Михаил Кукушкин шығады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).