АСТАНА. ҚазАқпарат - Индиан-Уэллсте (АҚШ) өтіп жатқан ірі халықаралық турнирде қазақстандық теннисшілер Юлия Путинцева мен Ярослава Шведова үшінші айналымға шықты.
Екінші айналымда Ю.Путинцева осы жарыстың 27-інші ракеткасы, франциялық Кристина Младеновичті 6:4, 6:4 есебімен ұтты. Енді ол әлемнің бірінші ракеткасы, атышулы америкалық Серена Уильямспен күш сынасады. Ал Я.Шведова турнирде 11-інші болып тіркелген чехиялық Люси Шафаржованы 6:3, 6:4 есебімен тізе бүктірді. Ярославаның келесі қарсыласы - тағы бір америкалық теннисші Николь Гиббс.
Еске сала кетейік, жүлде қоры 6,8 млн.-нан астам АҚШ долларын құрайтын аталмыш турнирдің екінші айналымында Қазақстанның тағы бір өкілі Зарина Дияс кезінде әлемнің маңдайалды теннисшісі болған, қазір осы турнирдің 13-інші ракеткасы, белоруссиялық Виктория Азаренкомен шеберлік байқасады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).