АСТАНА. ҚазАқпарат - Париж қаласында теннистен өтіп жатқан «Ролан Гаррос» турнирінде қазақстандықтардан әзірге Юлия Путинцева ғана сәтті өнер көрсетті.
Vesti.kz сайтынан алынған мәліметке қарағанда, әлемнің 99-ыншы ракеткасы, 20 жасар Ю.Путинцева өзінен екі жас үлкен сербиялық, дүниежүзілік рейтингте 87-інші орында тұрған Александра Круничпен кездесті. 2 сағат 15 минутқа созылған матчта қазақстандық теннисші 3:6, 6:3, 6:3 есебімен жеңіске жетті. Екінші айналымда Ю.Путинцева турнирдің 19-ыншы ракеткасы, украиналық Элина Свитолинамен шеберлік байқасады.
Айта кетейік, бұған дейін қазақстандықтар Ярослава Шведова, Михаил Кукушкин, Андрей Голубев бірінші айналымда-ақ қарсыластарынан жеңіліп, жарыс жолынан шығып қалды. Әзірге Қазақстанның бірінші ракеткасы Зарина Дияс кортқа шыққан жоқ. Ол іріктеу сайыстарынан негізгі турнирге өткен германиялық Дина Пфиценмайермен күш сынасады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).