НҰР-СҰЛТАН. ҚазАқпарат – Қазақстанның бірінші, әлемнің 32-ракеткасы Юлия Путинцева Брисбен (Аустралия) WTA турнирінде сәтті өнер көрсетуде, деп хабарлайды ҚазАқпарат тілшісі.
Негізгі турнирге іріктеу сайыстарынан кейін қосылған қазақстандық спортшы алғашқы айналымда әлемнің 20-ракеткасы, хорватиялық Донна Векичпен кездесті.
Бірінші партияда Ю.Путинцева 6:3 есебімен басым түссе, екіншісінде Д.Векич дәл сондай есеппен қарымта қайырды.
Үшінші, шешуші сетте қазақстандық теннисші матчты жеңіспен тәмамдай алды – 7:5.
Аса тартысты бәсеке 2 сағат 33 минутқа созылды.
Ю.Путинцева Брисбен турнирінің (жүлде қоры – 1,5 млн АҚШ доллары) екінші айналымында әлемнің 27-ракеткасы, америкалық Даниэль Коллинзбен шеберлік байқасады. Ол бірінші айналымда әлемнің 5-ракеткасы, украиналық Элина Свитолинаны қапы қалдырды.
Еске сала кетейік, бұдан бұрын Александр Бубликтің қазақстандық теннисшілердің жеңісті жолын жалғастырғанын, Зарина Диястың Қытайдағы турнирді сәтті бастағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).