НҰР-СҰЛТАН. ҚазАқпарат – Қазақстандық, әлемнің 42- ракеткасы Юлия Путинцева Уимблдон турнирінің үшінші айналымына шыға алмады, деп хабарлайды ҚазАқпараттілшісі.
Ю.Путинцева екінші айналымда әлемнің 33-інші, осы «Үлкен дулыға» додасының 30-ракеткасы, испаниялық Паула Бадосамен күш сынасты.
Бірінші партияда испаниялық теннисші 6:4 есебімен басымдылық танытты.
П.Бадоса екінші сетте қарқынын тіпті үдетті – 6:1.
Бәсеке 1 сағат 20 минутқа созылды.
Матч барысында испаниялық спортшы 2 эйс жасап, 9 брейк- пойнттың бесеуін пайдаланды. Бірде-бір рет эйс жасамаған Ю.Путинцева 3 брейк-пойнттың екеуін өз есебіне жазды.
Осылайша Уимблдонда жекелей сында Қазақстаннан Александр Бублик пен Елена Рыбакина ғана қалды.
П.Бадоса төртінші айналымға шығу үшін әлемнің бесінші, осы жарыстың 3-ракеткасы, украиналық Элина Свитолина немесе рейтингте 44-орындағы Польша өкілі Магда Линеттің біреуімен таласады.
Еске сала кетейік, бұдан бұрын Александр Бубликтің алғаш рет Уимблдон турнирінің екінші айналымына шыққанын, Елена Рыбакинаның үшінші айналымға өткенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).