АСТАНА. ҚазАқпарат - АҚШ-тың Чарльстон қаласында теннистен өтіп жатқан халықаралық турнирдің бірінші айналымында қазақстандық Зарина Дияс осы жарыстың 12-інші ракеткасы, австралиялық Дарья Гавриловамен күш сынасты.
Тікелей спорттық көрсетілім арқылы мәлім болғанындай, бірінші партия австралиялық теннисшінің басымдылығымен өтті. Ол есепті 5:0-ге жеткізгеннен кейін Зарина өз геймін алғанмен, Д.Гаврилова 6:1 есебімен жеңіске жетті. Екінші партияда дәл осы жағдай қайталанып, бұл жолы керісінше З.Дияс 6:1 есебімен ұтты. Шешуші, үшінші партияда брейк жасаған австралиялық теннисші 2:0 есебімен алға кетті. Бұдан кейін Зарина таразы басын теңестіргенімен, Дарья тағы бір брейкке қол жеткізіп, қорытындысында 6:3 есебімен қазақстандық теннисшіні тізе бүктірді.
Сөйтіп мұның алдындағы Майами турнирінде дәл осы Д.Гаврилованы 7:5, 6:3 есебімен ұтқан З.Дияс Чарльстон турнирінде алғашқы айналымнан аса алмады.
Еске сала кетейік, жүлде қоры 753 мың АҚШ долларын құрайтын Чарльстон турнирінің бірінші айналымында сондай-ақ Қазақстанның бірінші, әлемнің 61-інші ракеткасы Юлия Путинцева жапониялық Куруми Нарамен, ал Ярослава Шведова ресейлік Евгения Родинамен кортқа шығады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).