АСТАНА. ҚазАқпарат - Жапонияның Осака қаласында теннистен халықаралық турнир мәреге жетті.
Финалда қазақстандық Зарина Дияс пен австралиялық Саманта Стосурдың кездесуі 1 сағат 40 минутқа созылды. Бұл матчта Заринадан әлдеқайда тәжірибелі Саманта 7:6, 6:3 есебімен жеңіске жетті. Бірінші партия аса тартысты болып, онда Стосур тайк-брейкте ғана 9:7 есебімен ұта алды. Ал екінші партияда Самантаның шеберлігі анық байқалды. Стосур екі рет эйс жасап, үш брейк-понтты өз пайдасына жазды. Зарина екі эйске қол жеткізді.
Осымен С.Стосур Осака турнирінің үш дүркін жеңімпазы атанып отыр. Финалға дейін жеткен З.Дияс та бұл жарыста жақсы өнер көрсетіп, дүниежүзілік рейтингте өз есебіне 180 ұпай жазып, 21400 доллар табыс тапты.
Қазақстанның бірінші ракеткасы З.Дияс осыған дейін ITF турнирін бес рет ұтқанымен, Осакадағыдай, WTA жарыстарында әзірге озық шыға қойған жоқ.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).