ОРАЛ. ҚазАқпарат - Пекинде теннисте өтіп жатқан ірі халықаралық турнирдің алғашқы айналымында қазақстандық Зарина Дияс өзінен үш саты жоғары тұрған әлемнің 37-інші ракеткасы, чехиялық Клара Кукаловамен шеберлік сынасты.
Жуырда Қытайдың Ухань қаласында өткен сондай жарыста Зарина дәл осы К.Кукаловамен кездесіп, үш партияда жеңген болатын. «Чемпионат. Ком» сайтынан алынған мәліметке қарағанда, бұл жолы қазақ қызы Клараны екі партияда (6:1, 6:4) тізе бүктірді.
Екінші айналымда Зарина неміс қызы, әлемнің сегізінші ракеткасы Анжелика Кербер немесе австралиялық Кейси Деллакуамен кортқа шығады. Уханьда өткен турнирдің екінші айналымында З.Дияс тартысты кездесуде дәл осы А.Керберге жол берген еді.
Айта кетейік, Пекиндегі турнирдің жүлде қоры 5,4 млн. астам АҚШ долларын құрайды. Оған әлемнің мықты деген теннисшілері қатысуда. Өкінішке қарай, тағы бір қазақстандық Ярослава Шведова бірінші айналымда италиялық Роберта Винчиден үш партияда жеңіліп қалды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).