АСТАНА. ҚазАқпарат - Таиландтың Паттайя қаласында теннистен өтіп жатқан халықаралық турнирде бүгін Қазақстанның бірінші, әлемнің 33-інші ракеткасы Зарина Дияс словакиялық Даниэла Гантуховамен шеберлік байқасты.
Чемпионат.ком сайтынан алынған мәліметке қарағанда, Зарина кездесуді өте сәтті бастап, бірінші партияда 6:1 есебімен жеңіске жетті. Алайда осы басымдылығын ұстап тұра алмай, қалған партияларда 3:6, 1:6 есебімен ұтылуға мәжбүр болды. Сөйтіп Д.Гантухова биыл Хобарт турнирінде З.Диястан жеңіліп қалғанының есесін қайырды. Жалпы, ол да осал қарсылас емес. 2011 және 2012 жылдары осы Паттайя турнирінің жеңімпазы атанған тәжірибелі ойыншы.
Айта кетейік, бұл жарыстың жүлде қоры - 250 мың АҚШ доллары. Қазақстандық Юлия Путинцева кеше ресейлік Евгения Родинаға жол берсе, еліміздің екінші ракеткасы Ярослава Шведова турнирге қатысудан бас тартты. Сонымен, қазақстандықтар үшін Паттайя корты сәтсіз болды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).