НҰР-СҰЛТАН. ҚазАқпарат – Қазақстандық, әлемнің 104-ракеткасы Зарина Дияс Джорджия (АҚШ) ITF W80 турнирінің финалында ұтылып қалды, деп хабарлайды ҚазАқпарат тілшісі.
Қазақстандық теннисші финалда әлемнің 78-інші, осы жарыстың 1-ракеткасы Мэдисон Бренглмен бас жүлдені сарапқа салды.
Қарсыластар осыған дейін үш рет кездесіп, соның екеуінде Зарина жеңіске жеткен екен.
Бұл жолы бірінші партияда М.Бренгл 6:4 есебімен басымдылық көрсетті.
Екінші сетте З.Дияс дәл сондай есеппен қарымта қайырды.
Үшінші, шешуші партияда есеп 2:2 болған мезетте Бренгл брейк жасап, алға кеткенімен, Зарина сол бойда таразы басын теңестірді – 3:3. Бұдан кейін де қарсыластар брейк алмасты. Ақыры америкалық теннисшінің жолы болды – 6:4.
Тартысты бәсеке 2 сағат 38 минутқа созылды.
Еске сала кетейік, бұдан бұрын қазақстандық теннисшінің елордадағы жарыстың жеңімпазы атанғанын, Зарина Диястың АҚШ-тағы турнирдің финалына шыққанын жазған болатынбыз.
Сондай-ақ Жібек Құламбаева Қарағандыдағы турнирдің чемпионы атанды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).