АСТАНА. ҚазАқпарат - Қазақстанның бірінші ракеткасы Зарина Дияс 15-21 ақпан аралығында Дубайда өтетін ірі халықаралық турнирге қатысады.
Чемпионат.ком сайтынан алынған мәліметке қарағанда, Зарина алғашқы айналымда германиялық Анника Бекпен күш сынасады.
Бұл турнирге қатысудан әлемнің бірінші ракеткасы, американдық Серена Уильямс бас тартса да, басқа мықтылар баршылық. Солардың ішінде румыниялық Симона Халеп, чехиялық Петра Квитова, поляк Агнешка Радьванска, сербиялық Ана Иванович, ресейлік Екатерина Макароваларды айтса да, жеткілікті.
Жарыстың жүлде қоры да қомақты - 2,513 млн. АҚШ доллары.
Айта кетейік, Зарина осының алдында Таиландтың Паттайя қаласындағы турнирде бірінші айналымда словакиялық Даниэла Гантуховаға есе жіберген болатын. Д.Гантухова мықтылығын танытып, осы жарыстың финалына шығып отыр.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).