НҰР-СҰЛТАН. ҚазАқпарат – Қазақстандық Зарина Дияс Жапониядағы Хиросима WTA турнирінің ширек финалына шыға алмады, деп хабарлайды ҚазАқпарат тілшісі.
Әлемнің 80-інші, осы жарыстың 6-ракеткасы З.Дияс екінші айналымда рейтингте 146-орындағы жапониялық Нао Хибиномен кездесті.
Бірінші партияда Н.Хибино айқын басымдылық көрсетті – 6:1.
Екінші сетте есеп 2:3 болған мезетте З.Дияс жарысты жалғастырудан бас тартты.
2017 жылы осы доданың жеңімпазы болған қазақстандық теннисші биыл доданы ерте аяқтады.
Н.Хибино ширек финалда Хиросима турнирінің өткен жылғы жеңімпазы, биылғы бірінші, әлемнің 29-ракеткасы, тайбэйлік Се Шувэй немесе рейтингте 123-орындағы аустралиялық Присцилла Хонның біреуімен кортқа шығады.
Еске сала кетейік, бұдан бұрын Зарина Диястың Хиросима турнирін, ал Елена Рыбакинаның Қытайдағы Наньчан жарысын жеңіспен бастағанын жазған болатынбыз.
Бұл екі турнирдің де жүлде қоры – 250 мың АҚШ доллары.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).