АСТАНА. ҚазАқпарат - Нью-Дели қаласында (Үндістан) Федерация кубогы үшін Қазақстан - Қытай матчында кортқа алғашқы болып Зарина Дияс пен Чжаосюань Ян шықты, деп хабарлайды «ҚазАқпарат» тілшісі.
Зарина әлемдік рейтингте 55-інші, ал қытайлық теннисші 412-інші сатыда тұрғанына қарамастан, екеуі де өз елдерінің намысы үшін барын салды. Бірінші партияда қазақстандық спортшы 7:5 есебімен басым түсті. 1 сағат 17 минутқа созылған матчтың екінші партиясын да Зарина 6:2 есебімен ұтты.
Қазақстанның бірінші ракеткасы Зарина Дияс Гонконг және Үндістан құрамаларымен кездесуді де сәтті бастап, қарсыластарын тізе бүктірген еді.
Бүгін екінші кездесуде әлемнің 81-інші ракеткасы Юлия Путинцева дүниежүзілік рейтингте 125-інші орында тұрған Яфань Ванмен шеберлік байқасады.
Еске сала кетейік, қазақстандықтар бұдан бұрын Гонконг елінің өкілдерін 3:0, үндістандықтарды 2:1 есебімен ұтқан болатын. Бүгін олар А тобында қытайлықтармен бірінші орын таласуда. Бұл топта жеңімпаз атанған құрама В тобында үздік шыққан командамен ІІ Әлемдік лиганың плей-офф кезеңіне берілетін жолдаманы сарапқа салады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).