АСТАНА. ҚазАқпарат - Қазақстандық Зарина Дияс Ұлыбританияның Манчестер қаласында мәреге жеткен ITF турнирінде жеңімпаз атанды, деп хабарлайды «ҚазАқпарат» тілшісі.
www.myscore.ru сайтынан тікелей көрсетілімде белгілі болғанындай, әлемнің 207-інші ракеткасы З.Дияс финалда дүниежүзілік рейтингте 101-інші орында тұрған сербиялық Александра Круничті 6:4, 6:4 есебімен ұтты.
Сөйтіп, Зарина жүлде қоры 100 мың АҚШ доллары болатын Манчестер турнирінде жеңіс тұғырына көтерілді.
Еске сала кетейік, Зарина жартылай финалда әлемнің 115-інші ракеткасы, ұлыбританиялық Наоми Брэдиді 6:3, 6:4 есебімен жеңген болатын. Кезінде З.Дияс көп ұзамай басталатын «Үлкен дулыға» жарысының бірі - Уимблдон турнирінің төртінші айналымына дейін жеткен еді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).