НҰР-СҰЛТАН. ҚазАқпарат - Қазақстандық теннисші Зарина Дияс Монтеррей турнирінің екінші айналымында Беларусь спортшысы Виктория Азаренкомен кездесті, деп хабарлайды ҚазАқпарат тілшісі.
З.Дияс дүниежүзілік рейтингте 107-орында тұрса, кезінде Аустралия ашық чемпионатының екі мәрте жеңімпазы атанған, әлемнің 67-ракеткасы В.Азаренконың атақ-даңқы әлдеқайда жоғары еді.
Кезінде рейтингте көш бастаған В.Азаренконың сәбилі болуына байланысты спорттық жолында үзіліс орын алған еді. Енді ол бұрынғы орнына оралу үшін барынша күш салуда.
Бір сағаттан астам уақытқа созылған кездесу беларусь теннисшісінің басымдылығымен өтіп, 6:3, 6:2 есебімен аяқталды.
В.Азаренко ширек финалда әлемнің 33-ракеткасы, ресейлік Анастасия Павлюченковамен кортқа шығады.
Еске сала кетейік, бұдан бұрын З.Диястың жүлде қоры 250 мың АҚШ долларына бағаланған Монтеррей турнирінің екінші айналымына шыққанын, Александр Бубликтің осындағы челленджер жарысын сәтті бастағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).