11:04, 14 Мамыр 2018

Теннис: Зарина Дияс Рим турнирінде әлемнің бұрынғы бірінші ракеткасымен ойнайды

ОРАЛ. ҚазАқпарат - Қазақстанның бірінші, әлемнің 54-інші ракеткасы Зарина Дияс Рим турнирінде германиялық Анжелика Кербермен ойнайды, деп хабарлайды ҚазАқпарат тілшісі.

Myscore.ru спорт сайтынан алынған мәліметке қарағанда, осы жарыстың іріктеу сайысының финалында қазақстандық теннисші австралиялық Айла Томляновичтен жеңіліп қалғанымен, негізгі турнирге лаки лузер ретінде қосылды. Ал кезінде әлемдік рейтингте көш бастаған Анжелика Кербер қазіргі кезде 12-інші орында келеді. А.Кербер - З.Дияс жұбының жеңімпазы екінші айналымда румыниялық Ирина Бегу немесе қытайлық Шуай Пэннің біреуімен кездеседі.

Тағы бір қазақстандық теннисші Юлия Путинцева, сондай-ақ ерлер арасында Михаил Кукушкин іріктеу сайысының жартылай финалынан аса алмады.

Жүлде қоры 3,2 млн АҚШ долларынан асатын Рим турнирі 20 мамырда мәреге жетеді.

Айта кетейік, бүгін жаңартылған дүниежүзілік рейтингте З.Дияс 54-орында қалса, Ю.Путинцева 85-тен 80-інші сатыға көтерілді. М.Кукушкин де көрсеткішін жақсартып, 96-дан 91-орынға ауысты.

Спорт Қоғам
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).