АСТАНА. ҚазАқпарат - Жапонияның Осака қаласында 12 қазан күні таңмен болатын теннистен халықаралық турнирдің финалында қазақстандық Зарина Дияс австралиялық азулы спортшы Саманта Стосурмен кездеседі.
Осы жарыс басталар кезде З.Диястың С.Стосурмен жолы финалда тоқайласуы мүмкін, басқа қарсыластармен Зарина тайталаса алады деген болатынбыз. Сол айтқанымыз келді. С.Стосур бүгін екінші жартылай финалда украин қызы Элина Свитолинаны 7:6, 6:2 есебімен жеңді.
Соңғы сын, әрине, Заринаға оңай тимейді. Саманта - басқасын айтпағанда, «үлкен дулыға» деп аталатын турнирді ұтқан, атағынан ат үркетін теннисші.
2011 жылы Америка ашық чемпионатының финалында қазір әлемдік рейтингтің көшін бастап келе жатқан Серена Уильямстың өзін тізе бүктіріп, жеңімпаз атанған. Дегенмен, отыздың биігіне шыққан Самантадан әлдеқайда жас спортшымызға сәттілік тілейік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).