НҰР-СҰЛТАН. ҚазАқпарат – Қазақстанның бірінші, әлемнің 20-ракеткасы Елена Рыбакина US Open турнирін жеңіспен бастады, деп хабарлайды ҚазАқпарат тілшісі.
Осы «Үлкен дулыға» жарысының 19-ракеткасы болып тіркелген қазақстандық теннисші бастапқы кездесуін рейтингте 90-сатыдағы Беларусь өкілі Александра Сасновичпен өткізді.
Бірінші партияда қос брейк жасаған Е.Рыбакина қарсыласына дес берген жоқ – 6:2.
Екінші сетте есеп 4:3 болған мезетте қазақстандық теннисші брейк жасай білді. Сосын матчқа доп бергенде, мүмкіндігін жіберген жоқ – 6:3.
Рыбакина 1 сағат 15 минутқа созылған бәсеке барысында 10 эйс жасап, 10 брейк-пойнттың үшеуін пайдаланды. Брейк жасай алмаған қарсыласы 1 эйспен шектелді.
Е.Рыбакина екінші айналымда әлемнің 62-ракеткасы, франциялық Каролин Гарсия немесе рейтингте 151-орында тұрған ұлыбританиялық Хэрриет Дарттың біреуімен шеберлік байқасады.
Еске сала кетейік, бұдан бұрын Нью-Йоркта US Open турнирі басталатынын, Юлия Путинцеваның жеңіліп қалғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).