НҰР-СҰЛТАН. ҚазАқпарат – Қазақстанның бірінші, әлемнің 38-ракеткасы Юлия Путинцева Бейжің WTA турнирінің екінші айналымына шықты, деп хабарлайды ҚазАқпарат тілшісі.
Қазақстандық теннисші алғашқы айналымда ресейлік, дүниежүзілік рейтингте 66-орында тұрған Анна Блинковамен күш сынасты.
Бірінші партияда Ю.Путинцева қарсыласына бірде-бір гейм берген жоқ – 6:0.
Екінші сетте Юлия тағы да 3:0 есебімен алға шықты. Тек содан кейін ғана А.Блинкова өзі доп берген геймді алды. Ю.Путинцева матчты тағы бір брейкпен түйіндеді – 6:1.
Қазақстандық теннисшінің айқын басымдылығымен өткен бәсеке 1 сағат 10 минутқа созылды.
Бейжіңде іріктеу сайыстарының финалында кеше Зарина Дияс дәл осы А.Блинковадан ұтылып қалған болатын. Осылайша Заринаның кеткен есесін Юлия қайтарды.
Ю.Путинцева Бейжің додасының (жүлде қоры – 8,3 млн-ға жуық АҚШ доллары) екінші айналымында әлемнің 1-ракеткасы, аустралиялық Эшли Бартимен кортқа шығады.
Еске сала кетейік, бұдан бұрын Зарина Диястың Бейжіңде негізгі турнирге өте алмағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).