НҰР-СҰЛТАН. ҚазАқпарат – Қазақстандық теннисші Зарина Дияс биылғы жарыстарға қатыса алмайтынын мәлімдеді, деп хабарлайды ҚазАқпарат тілшісі.
Қазақстандық спортшы жарақаты мен денсаулығындағы кінәратқа байланысты өзінің сүйікті Уимблдон және басқа турнирлерде өнер көрсетпейтінін жария етті.
«Бұл мен үшін, әрине, ауыр. Бірақ ештеңе істей алмайсың, осыған көндігіп, денсаулығымды қалпына келтіруді бастау қажет. Сөйтіп 2023 жылы кортқа тың күшпен оралу керек. Соңғы айларда қиындықты жеңе отырып, ауырсам да, жаттығуға тура келді. Қазір енді денсаулықты күтіп, жаңа маусымға дайындықты барынша тезірек бастауға тырыссам ба деймін. Жанкүйерлеріме сенімдеріңіз үшін алғысымды айтамын. Өздеріңізді сақтаңыздар!», деді Зарина Дияс.
Кезінде әлемдік рейтингте 31-орынға дейін көтерілген Зарина күні бүгін 200-сатыда тұр.
Еске сала кетейік, бұдан бұрын Григорий Ломакиннің Миланда жарыстың бірінші ракеткасын ұтқанын, Михаил Кукушкиннің Уимблдонда іріктеу сайыстарының финалына шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).