АСТАНА. KAZINFORM — Қазақстан жасөспірімдер құрамасы 14 жасқа дейінгілер арасында Кучингте ((Малайзия) өтіп жатқан World Junior Tennis Competition 14&under Азия – Тынық мұхит аймағы бойынша іріктеу кезеңінде ширек финалға шықты.
Өз тобында соңғы ойында Марат Шәріповтің шәкірттері Иран командасын 3:0 есебімен ойсырата ұтты.
Медина Өтепберген Рахиманамириден 6:2, 6:2 есебімен айласын асырса, Найля Баймахан Шабанпурды шыдатпады – 6:4, 6:1.
Жұптық сында М.Өтепберген – Екатерина Кирюшенко Рахиманамири – Мелинадан басым түсті – 6:1, 6:3.
Осылайша, өз тобынан екінші орынмен ширек финалға жолдама алған қазақстандықтар ертең, 21 наурыз күні Аустралия құрамасымен ойнайды.
Еске сала кетейік, бұдан бұрын Денис Евсеевтің жұптық сында Испаниядағы жарыстың ширек финалына өткенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).