МАДРИД. ҚазАқпарат - Мадридте өтіп жатқан Дэвис кубогы финалдық кезеңінің топтық бәсекесінде Қазақстан - Швеция матчында Александр Бублик есепті теңестірді, деп хабарлайды ҚазАқпарат тілшісі.
Қазақстанның бірінші теннисшісі швециялық Микаэль Имермен күш сынасты.
Бірінші ойында Михаил Кукушкин жеңіліп қалғаннан кейін А.Бубликке қалайда таразы басын теңестіру керек еді.
Бірінші партияда М.Имер 3:0 есебімен алға шықты. Сосын осы басымдылығын сақтай алды - 6:3.
Есесіне екінші сетте есеп 4:4 болғанда, Бублик брейк жасап, өз геймін де алды - 6:4.
Үшінші, шешуші партияда А.Бублик қарсыласына еш мүмкіндік берген жоқ - 6:0.
Сағат жарымнан астам уақытқа созылған матчта Бублик 9 эйс жасап, 8 брейк-пойнттың тең жартысын пайдаланды.
Осылайша Қазақстан - Швеция матчында есеп теңесті - 1:1.
Енді матч тағдыры жұптық кездесуде шешіледі.
Еске сала кетейік, бұдан бұрын Қазақстан мен Швеция кездесетінін, Михаил Кукушкиннің қарсыласына есе жібергенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).