АСТАНА. ҚазАқпарат - Белградта мәреге жеткен Дэвис кубогының 1/8 сайысында Сербия мен Қазақстан арасындағы соңғы, шешуші кездесуде Виктор Троицки мен Александр Недовесов кортқа шықты.
«Қазспорт» телеарнасынан тікелей эфирде көрсеткеніндей, екі сағатқа жуық уақытқа созылған бұл матчта әлемнің 23-інші ракеткасы В.Троицки А.Недовесовті 6:2, 6:3, 6:4 есебімен үш партияда ұта білді. Сөйтіп ол Сербия құрамасына жеңіс әперді.
Жалпы, Қазақстан құрамасы сербиялықтардан жеңіліп қалғанымен, тайталаса білді. Әрине, М.Кукушкиндей тағы бір шебер ойыншы болғанда, қазақстандықтардың келесі айналымға шығуы да мүмкін еді. Бұл матчтық кездесуде әлемнің бірінші ракеткасы Н.Джоковичтің екі мәрте жеңіске жетіп, шешуші рөл атқарғанын айта кету керек.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).