ОРАЛ. ҚазАқпарат – Шотландияның Глазго қаласында өтіп жатқан Дэвис кубогының топтық бәсекесінде Қазақстан құрамасы өнер көрсететін D тобынан ширек финалға шыққан командалар анықталды, деп хабарлайды ҚазАқпарат тілшісі.
Қазақстан теннис федерациясынан мәлім еткеніндей, Нидерланд құрамасы Ұлыбританияны 2:1 есебімен ұтып, командалық әлем чемпионатының ширек финалына жолдама алды.
Бұл матчта Нидерландқа шешуші ұпайды жұптық бәсекеде Весли Колхоф пен Матве Мидделкоп әперді. Олар ұлыбританиялықтар Энди Маррей – Джо Солсбериді жеңді – 7:6 (7:0), 6:7 (6:8), 6:3.
Осыған дейін нидерландылықтар Қазақстан құрамасынан басым түскен болатын. Ал АҚШ Қазақстан мен Ұлыбританиядан айласын асырған еді.
Сөйтіп, 18 қыркүйек күні өтетін Қазақстан – Ұлыбритания матчының нәтижесіне қарамастан, америкалықтар мен нидерландылықтар ширек финалға жолдама алды. Бүгін олардың өзара бәсекесінде D тобында қай команданың бірінші орын алатыны белгілі болады.
Еске сала кетейік, бұдан бұрын Елена Рыбакинаның Словениядағы жарыстың жартылай финалына шыққанын жазған болатынбыз.
Сондай-ақ қазақстандық жасөспірімдер теннистен Азия біріншілігінің финалына шықты.
Қазақстандық теннисші Ыстанбұл турнирінде табысты өнер көрсетті.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).