НҰР-СҰЛТАН. ҚазАқпарат – Майамиде (АҚШ) Miami Open presented by Itaú турнирінде қазақстандықтар Александр Бублик пен Михаил Кукушкиннің қарсыластары белгілі болды, деп хабарлайды ҚазАқпарат тілшісі.
Қазақстан теннис федерациясы мәлім еткеніндей, еліміздің бірінші, әлемнің 44-ракеткасы Александр Бублик жарысты екінші айналымнан бастайды.
А.Бублик әлемнің 57-ракеткасы, сербиялық Ласло Дьере немесе рейтингте 71-сатыдағы чехиялық Иржи Веселыйдың біреуімен кездеседі.
Әлемнің 105-ракеткасы М.Кукушкин рейтингте 316-орында тұрған ұлыбританиялық Джек Грэйпермен күш сынасады. Оны жеңсе, екінші айналымда жуырда өткен Dubai Duty Free Tennis Championships турнирінің жеңімпазы, кеше рейтингте 27-орынға көтерілген ресейлік Аслан Карацевпен кортқа шығады.
Тағы бір қазақстандық Дмитрий Попко іріктеу сайыстарында америкалық Бьорн Фратанджелодан 5:7, 2:6 есебімен ұтылып қалды.
Еске сала кетейік, бұдан бұрын қазақстандық теннисшілердің Майами турниріндегі қарсыластары анықталғанын жазған болатынбыз.
Әйелдер арасында Қазақстаннан әлемнің 89-ракеткасы Зарина Дияс бірінші болып жарыс жолына шығады. Ол рейтингте өзінен он саты жоғары тұрған америкалық Винус Уильямспен шеберлік байқасады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).