НҰР-СҰЛТАН. ҚазАқпарат – Қазақстанның бірінші, әлемнің 35-ракеткасы Александр Бублик Монпелье (Франция) ATP 250 турнирінің жартылай финалына шықты, деп хабарлайды ҚазАқпарат тілшісі.
Қазақстандық теннисші ширек финалда әлемнің 19-ыншы, осы жарыстың 2-ракеткасы, испаниялық Роберто Баутиста-Агутпен шеберлік байқасты.
Бірінші партияда А.Бублик басымдылық танытты – 6:4.
Екіншісінде испаниялық спортшы есе қайырды – 6:2.
Үшінші, шешуші сетте матч тағдыры тай-брейкте шешілді. Онда А.Бублик кездесуді эйспен тәмамдады – 7:6 (7:4).
Қазақстандық теннисші 2 сағат 4 минутқа созылған тартысты бәсеке барысында 26 эйс жасап, 9 брейк-пойнттың біреуін пайдаланды. Қарсыласы 1 эйс, 2 брейкпен (5 брейк-пойнт) көзге түсті.
А.Бублик финалға шығу үшін рейтингте өзінен бір саты төмен тұрған сербиялық Филип Краиновичпен таласады.
Еске сала кетейік, бұдан бұрын Александр Бубликтің Монпелье турнирінің ширек финалына шыққанын, Дэвис кубогы матчына қатысатын Қазақстан құрамасы жарияланғанын жазған болатынбыз.
Сондай-ақ қазақстандық теннисші Мысырдағы турнирдің жартылай финалына шықты.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).