НҰР-СҰЛТАН. ҚазАқпарат – Қазақстандықтар Дмитрий Попко мен Александр Недовесов елордада өтіп жатқан Forte Challenger 100 турнирінде жұптық кездесулерін сәтті өткізді, деп хабарлайды ҚазАқпарат тілшісі.
Алдымен грузиялық Александр Метревелимен жұп құрған Д.Попко кортқа шығып, ресейлік Ян Бондаревский – чехиялық Доминик Паланмен кездесті.
Қазақстандық-грузиялық жұп 1 сағаттан сәл астам уақытқа созылған бәсекеде 6:3, 6:4 есебімен ұтты. Енді олар жартылай финалға шығу үшін америкалықтар Натан Паша – Макс Шнурмен таласады.
Жұптық сында осы жарыстың 1-ракеткалары болып тіркелген А.Недовесов пен украиналық Денис Молчанов қазақстандықтар Сағадат Аяп – Данил Озерноймен шеберлік байқасты.
Челленджер додаларында жеңіске жетіп жүрген А.Недовесов пен Д.Молчанов қарсыластарынан 6:3, 6:1 есебімен басым түсті. Енді олар ширек финалда ресейлік Павел Котов – тайбэйлік Тунг-Лин Вумен күш сынасады.
Еске сала кетейік, бұдан бұрын Денис Евсеевтің жұптық сында Нұр-Сұлтан турнирінің ширек финалына шыққанын, ал Ю.Путинцеваның Аделаида додасында жеңіліп қалғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).