АСТАНА. KAZINFORM — Қазақстандық теннисші, әлемнің 230-ракеткасы Бейбіт Жұқаев Штутгарт (Германия) АТР 250 турнирінің іріктеу сайысында сенсациялық жеңіске қол жеткізді.
Отандасымыз іріктеу сайыстарының жартылай финалында әлемнің 158-ракеткасы, швейцариялық Марк-Андреа Хуслердің мысын басты.
Іріктеу сайыстарының 8-ракеткасы болып тіркелген швейцариялық теннисші фаворит саналғанымен, Бейбіт одан айласын асыра алды – 6:3, 5:7, 6:4.
Бір сағат 40 минутқа созылған бәсекеде Жұқаев 13 эйспен бірге 4 брейк-пойнттың тең жартысын құр жіберген жоқ. Хуслер 16 эйс, 1 брейкпен (2 брейк-пойнт) көзге түсті.
Бейбіт іріктеу сайыстарының финалында әлемнің 124-ракеткасы, мажарстандық Мартон Фучовичпен кездеседі. Оны жеңсе, жарыстың негізгі кезеңіне жолдама алады.
Еске сала кетейік, бұдан бұрын Анна Данилинаның Ролан Гаррос турнирінің финалында есе жібергенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).