АСТАНА. KAZINFORM - Аустралияның Сидней және Перт қалаларында теннистен аралас командалық сында өтіп жатқан United Cup турнирінде Қазақстан құрамасы Грекиямен бетпе-бет келді.
Кортқа алғашқы болып дүниежүзілік рейтингіде 78-орында тұрған Александр Шевченко мен әлемнің 11-ракеткасы Стефанос Циципас шықты.
Қазақстандық теннисші бірінші партияны 6:4 есебімен аяқтаса, екінші сетте тай-брейкте жеңісті жұлып алды – 7:6 (7:0).
Бір сағат 52 минутқа созылған тартысты бәсеке барысында А.Шевченко 2 эйспен бірге 4 брейк-пойнттың тең жартысын құр жіберген жоқ. С.Циципас 7 эйс, 1 брейкпен (2 брейк-пойнт) көзге түсті.
Енді Елена Рыбакина мен Мария Саккари сынға түседі.
Қазақстандықтар С тобында алғашқы матчта Испанияны 2:1 есебімен жеңген еді.
Грекиялықтар да Испания құрамасын дәл осындай есеппен ұтқан болатын.
Еске сала кетейік, бұдан бұрын теннистен United Cup турнирінде Қазақстан құрамасының Испанияны жеңгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).