«Біз бұрын тұрақтылықтың, келісімнің қамалы есебінде елімізде ештеңе болмайтын сияқты көрдік те, оған жете көңіл бөлген жоқпыз. Егер мұндай құбылыстар болса басқа шет елдерде болуы мүмкін деген ойда болдық. Бүгін осындай жағдай басымызға келгенде бұл мәселеге ғалымдар да, саясаткерлер де дайын болмай шықты. Шын мәнінде террорология өзінше бір ғылым. Бұл ілімнің тарихи тамыры терең. Бұл құбылыс әр мемлекетте әртүрлі себептермен болады. Оның артында кімдер тұр, қандай күштер тұр, қаржы көздері қандай, оны тек діннен көру дұрыс па, болмаса басқа да себептері бар ма деген мәселелерге біз енді-енді ғана мән беріп жатырмыз», - дейді философия ғылымының докторы Амангелді Айталы.
Саясаттанушы ғалымның айтуынша, терроризм болсын, экстремизм болсын оның себебін өзіміздің ішімізден іздеуіміз керек. Біз сүттей ұйып отырмыз, сырттан біздің арамызға жік салып, елімізді бүлдіріп жатыр десек өзімізге-өзіміз сын көзімен қарауға мүмкіншілігіміз болмайды.