ОРАЛ. 15 мамыр. ҚазАқпарат - Батыс Қазақстан облысында ақындар, Алаш қайраткерлері Ғұмар Қараш және Елеусін Бұйрин атындағы «Тілші болғың келсе...» атты байқау ұйымдастырылып отыр.
Бұл туралы «Жайық Пресс» ЖШС бас директоры Жантас Сафуллин мәлім етті.
Оның айтуынша, Ғ.Қараш пен Е.Бұйрин - 1911 жылы «Қазақстан» деген атаумен Ордада, кейін Оралда шыққан газеттің алғашқы ұйымдастырушылары. Олар осы басылымды жарыққа шығаруға көп еңбек сіңірді. Мәселен, қазақ тілді материалдарға Ғұмар Қараш, ал орыс тілдісіне Елеусін Бұйрин жауапты болды. Осы себепті жеңімпаздарға қазақ тілінде жарияланған үздік мақала үшін Ғ.Қараш атындағы 100 мың теңге, ал орыс тіліндегі мақала үшін Е.Бұйрин атындағы 100 мың теңге жүлде берілетін болады. Сондай-ақ байқау жеңімпаздары өзі тұратын мекендегі газетке тілшілік қызметке орналаса алады.
Айта кету керек, байқауға материалдар жолдау 20 маусымда аяқталмақ. 18 бен 40 жас аралығындағы жандар байқауға қатысып, бақ сынай алады. Үздік материалдар облыстық «Орал өңірі» және «Приуралье» газеттерінде жарияланады. Ал жалпы байқау Қазақстан журналистері күні қорытындыланбақ.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).