АСТАНА. KAZINFORM — Қазақстандық теннисші, әлемнің 190-ракеткасы, 23 жастағы Тимофей Скатов АҚШ ашық чемпионатының іріктеу сайысын сәтті қорытындылады.
Қазақстандық теннисші іріктеу сайыстарының финалында әлемнің 104-ракеткасы, ұлыбританиялық, 29 жастағы Билли Харриспен негізгі доданың жолдамасын сарапқа салды.
Бірінші партияда Харрис 6:4 есебімен басымдылық танытты.
Есесіне екіншісінде Скатов азулы қарсыласына еш мүмкіндік берген жоқ – 6:0.
Үшінші, шешуші сетте Тимофей матчты жеңіспен түйіндей білді – 6:3.
Екі сағат 14 минутқа созылған тартысты бәсеке барысында қазақстандық теннисші 3 эйспен бірге 10 брейк-пойнттың тең жартысын пайдаланды. Харрис 12 эйс, 2 брейкпен (10 брейк-пойнт) көзге түсті.
Өткен жылы АҚШ чемпионатында Тимофей Скатов іріктеу сайыстарын сәтті өткізіп, алғашқы айналымда ойнаған еді.
Еске сала кетейік, бұдан бұрын US Open турнирінде Тимофей Скатовтың іріктеу сайысының финалына шыққанын жазған болатынбыз.
Сондай-ақ Жібек Құламбаева Сербиядағы жарыстың жартылай финалына өтті.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).