АСТАНА. ҚазАқпарат - Қазақстандық, әлемнің 147-ракеткасы Тимофей Скатов алғаш рет Ролан Гарростың негізгі турниріне жолдама алды, деп хабарлайды ҚазАқпарат тілшісі.
Қазақстандық теннисші іріктеу сайыстарының финалында дүниежүзілік рейтингте 165-орында тұрған бразилиялық Фелипе Мелигени Родригес Алвеспен жолдама үшін сынға түсті.
Бірінші партияда қос брейкке қол жеткізген бразилиялық спортшы басымдылық көрсетті - 6:2. Ол екінші сетте де 4:2 есебімен алға шықты.
Дегенмен қазақстандық теннисші таразы басын аудара білді - 7:5. Содан кейін үшінші, шешуші сетте жеңісті жұлып алды - 6:3.
Тартысты өткен бәсеке 2 сағат 13 минутқа созылды.
Осылайша, 22 жастағы Т.Скатов өз спорттық жолында алғаш рет Франция ашық чемпионатында ойнайтын болады. Оның қарсыласы кейін анықталады.
Еске сала кетейік, бұдан бұрын Жібек Құламбаеваның Сербиядағы жарыстың жартылай финалына шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).