АСТАНА. KAZINFORM — Қазақстандық теннисші, әлемнің 308-ракеткасы Тимофей Скатов Бонн (Германия) челленджер турнирінің финалына жолдама алды.
Қазақстандық теннисші жартылай финалда әлемнің 107-інші, осы жарыстың 2-ракеткасы, бельгиялық Рафаэль Коллиньонмен бетпе-бет келді.
Бірінші партияда Скатов 6:4 есебімен басымдылық танытты.
Екіншісінде бельгиялық спортшы қарымта қайырды — 6:4.
Үшінші, шешуші сетте Тимофей азулы қарсыласын жерге қаратты — 7:5.
Екі сағат 49 минутқа созылған тартысты бәсекеде Скатов 2 эйспен бірге 10 брейк-пойнттың тең жартысын өз пайдасына шешті. Коллиньон 6 эйс, 4 брейкпен (11 брейк-пойнт) ерекшеленді.
Тимофей Скатов финалда аустриялықтар, әлемнің 185-ракеткасы Юрий Родионов немесе рейтингіде 342-сатыдағы Йоэль Шверцлердің қай жеңгенімен бас жүлдені сарапқа салады.
Еске сала кетейік, бұдан бұрын Президент кубогында қазақстандық теннисшілердің жұптық сында жеңімпаз атанғанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).