АСТАНА. ҚазАқпарат – Қазақстанның екінші, әлемнің 138-ракеткасы Тимофей Скатов Брауншвейг (Германия) челленджер турнирінің екінші айналымына шықты, деп хабарлайды ҚазАқпарат тілшісі.
Қазақстандық теннисші бастапқы кездесуін дүниежүзілік рейтингте 513-орында тұрған франциялық Константин Биттун-Кузьминмен өткізді.
Т.Скатов 6:3, 6:1 есебімен оңай жеңіске қол жеткізді.
Бір сағаттан астам уақытқа созылған бәсеке барысында ол 3 эйс жасап, 5 брейк-пойнттың төртеуін пайдаланды.
Тимофей Скатов ширек финалға шығу үшін рейтингте 266-сатыдағы ливандық Бенджамин Хассанмен таласады.
Тағы бір қазақстандық Денис Евсеев осы додада бразилиялық Тьяго Уайлдқа жол берді – 6:4, 4:6, 1:6.
Т.Скатов бұдан бір апта бұрын Карлсруэдегі осындай жарыстың жартылай финалына дейін жеткен еді.
Еске сала кетейік, бұдан бұрын Елена Рыбакинаның Уимблдонның ширек финалына жолдама алғанын жазған едік.
Сондай-ақ Юлия Путинцева Швециядағы жарысты жеңіспен бастады.
Уимблдонда әлемнің бірінші ракеткасы жеңіліп қалды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).