АСТАНА. KAZINFORM — Қазақстандық, әлемнің 175-ракеткасы Тимофей Скатов Жирона (Испания) челленджер турнирінің екінші айналымына шықты.
Доданы іріктеу сайыстарынан бастаған қазақстандық спортшы алғашқы айналымда әлемнің 107-нші, осы жарыстың 3-ракеткасы, Боливия өкілі Уго Дельенмен кездесті.
Тимофей Скатов азулы қарсыласын 6:1, 6:3 есебімен ойсырата ұтты.
Бір сағат 22 минутқа созылған бәсеке барысында Скатов 2 эйспен бірге 9 брейк-пойнттың төртеуін пайдаланды. Дельен 3 эйспен көзге түсті.
Тимофей Скатов ширек финалға шығу үшін әлемнің 189-ракеткасы, молдовалық Раду Алботпен шеберлік таластырады.
Еске сала кетейік, бұдан бұрын Тимофей Скатовтың Испаниядағы Жирона турнирін сәтті бастағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).