АСТАНА. KAZINFORM - Қазақстандық, әлемнің 277-ракеткасы Тимофей Скатов Барлетта (Италия) челленджер турнирінің екінші айналымына өтті.
Қазақстандық теннисші алғашқы айналымда дүниежүзілік рейтингіде 626-орында тұрған корт иесі Андреа Гуэрриримен сынға түсті.
Үш сағат 35 минутқа созылған тартысты бәсекеде Скатов қарсыласын 6:4, 4:6, 7:5 есебімен қапы қалдырды.
Тимофей 4 эйспен бірге 16 брейк-пойнттың 8-ін мүлт жібермеді. Андреа 7 брейкпен (19 брейк-пойнт) көзге түсті.
Тимофей Скатов ширек финалға шығу үшін әлемнің 166-ракеткасы, Аустрия өкілі Филип Мисоличпен таласады.
Тағы бір Қазақстандық, әлемнің 56-ракеткасы Александр Шевченко Марракеш (Марокко) ATP 250 жарысының алғашқы айналымында тағы бір италиялық, кезінде рейтингіде 6-сатыға дейін көтерілген, қазір 135-орындағы Маттео Берреттиниден ойсырай ұтылды - 2:6, 1:6.
Еске сала кетейік, бұдан бұрын Елена Рыбакинаның эйс жасау жөнінен әлемде көш бастағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).