АСТАНА. KAZINFORM – Қазақстандық теннисші, әлемнің 181-ракеткасы Тимофей Скатов Франкавилла (Италия) челленджер турнирінің 1/8 финалына өтті.
Жарыстың 3-ракеткасы болып тіркелген қазақстандық теннисші бастапқы кездесуін дүниежүзілік рейтингіде 345-орында тұрған германиялық Джастин Энгельмен өткізді.
Скатов матчты сәтті бастады – 6:4. Алайда екінші сетте Энгель қарымта қайтарды – 6:2.
Дегенмен үшінші, шешуші партияда қазақстандық спортшы таразы басын аудара білді – 6:4.
Екі сағат 16 минутқа созылған бәсекеде Скатов 2 эйспен бірге 11 брейк-пойнттың төртеуін пайдаланды. Энгель 5 эйс, 4 брейкпен (8 брейк-пойнт) көзге түсті.
Тимофей Скатов ширек финалға шығу үшін әлемнің 331-ракеткасы, италиялық Джованни Фонио немесе рейтингіде 556-сатыдағы франциялық Бенуа Пэрдің біреуімен таласады.
Еске сала кетейік, бұдан бұрын Жібек Құламбаеваның жеңісті жолын Франциядағы турнирде жалғастырғанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).