Тимофей Скатов Нью-Дели турнирінің екінші айналымына шықты

АСТАНА. KAZINFORM — Қазақстандық теннисші Тимофей Скатов Нью-Дели (Үндістан) челленджер турнирінің екінші айналымына жолдама алды.

Қазақстандық теннисші алғашқы айналымда дүниежүзілік рейтингіде 500-орында тұрған жергілікті спортшы Каран Сингхпен шеберлік байқасты.

Өткен аптада Үндістандағы Ченнай додасының ширек финалына дейін жеткен Т.Скатов бүгін жаңартылған ATP рейтингісінде 202-ден 199-орынға көтеріліп, ТОП-200-ге қайта енген еді.

Бұл жолы бірінші партияда Тимофей 6:4 есебімен басымдылық танытты. Екінші сетте үндістандық теннисшіге бірде-бір гейм берген жоқ — 6:0.

Бір сағат 23 минутқа созылған бәсекеде Тимофей 3 эйспен бірге 5 брейк-пойнттың төртеуін өз есебіне жазды. Сингх 2 эйспен шектелді.

Тимофей Скатов ширек финалға шығу үшін әлемнің 231-ракеткасы, чехиялық Марек Генгел немесе рейтингіде 406-сатыдағы америкалық Андре Илаганның қай жеңгенімен таласады.

Тағы бір қазақстандық, әлемнің 208-ракеткасы Дмитрий Попко Делрэй-Бич (АҚШ) ATP 250 турнирінде іріктеу сайысының финалында америкалық, рейтингіде 328-орындағы Майкл Ммоға 6:7 (5:7), 0:6 есебімен жол берді. Сөйтіп негізгі жарыстан тыс қалды. 

Еске сала кетейік, бұдан бұрын Юлия Путинцеваның әлемдік рейтингіде ТОП-20-ға қайта кіргенін жазған едік.