АСТАНА. KAZINFORM — Қазақстандық теннисші, әлемнің 150-ракеткасы Тимофей Скатов Сан-Марино челленджер турнирін сәтті бастады.
Қазақстандық теннисші бастапқы кездесуін рейтингіде 321-орындағы франциялық Том Форелмен өткізді.
Бірінші партияда Т.Скатов айқын басымдылық танытты – 6:1.
Тартысты өрбіген екінші сетте де тай-брейкте есесін жібермеді – 7:6 (10:8).
Бір сағат 42 минутқа созылған матчта Скатов 9 эйспен бірге 8 брейк-пойнттың үшеуін өз есебіне жазды. Форел 1 эйс, 1 брейкпен шектелді.
Тимофей Скатов ширек финалға шығу үшін әлемнің 115-ракеткасы, финляндиялық Отто Виртанен немесе рейтингіде 300-сатыдағы италиялық Филиппо Романоның қай жеңгенімен таласады.
Кеше жаңартылған ATP рейтингісінде Т.Скатов 163-тен 150-орынға көтерілген болатын.
Еске сала кетейік, бұдан бұрын Жібек Құламбаеваның әлемдік рейтингіде 115-орынға көтерілгенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).