АСТАНА. KAZINFORM – Қазақстандық теннисші, әлемнің 198-ракеткасы Тимофей Скатов Шымкент челленджер турнирінің финалына шықты.
Жарыстың 1-ракеткасы болып тіркелген қазақстандық теннисші жартылай финалда рейтингіде 325-орындағы франциялық Антуан Гибодомен бетпе-бет келді.
Тимофей бірінші сетте 4:1 есебімен алға кетті. Сол басымдылығын сақтап қала алды – 6:2. Скатов екінші партияны да дәл осындай есеппен аяқтады - 6:2.
Бір сағат 23 минутқа созылған бәсекеде Т.Скатов 2 эйспен бірге 12 брейк-пойнттың бесеуін пайдаланды. Гибодо 3 эйс, 1 брейкпен (4 брейк-пойнт) көзге түсті.
Тимофей Скатов финалда чемпиондық атақты әлемнің 359-ракеткасы, өзбекстандық Сергей Фоминмен сарапқа салады. Ол әлемнің 285-ракеткасы, босниялық Андрей Недичті жолдан тайдырды – 4:6, 6:1, 6:4.
Еске сала кетейік, бұдан бұрын Аружан Сағындықованың Мысырдағы жарыстың ширек финалына жолдама алғанын жазғанбыз.
Сондай-ақ Жібек Құламбаева жұптық сында Қытайдағы жарыстың финалына шықты.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).