АСТАНА. KAZINFORM — Қазақстандық теннисші, әлемнің 198-ракеткасы Тимофей Скатов Шымкент челленджер турнирінің жартылай финалына жолдама алды.
Доданың 1-ракеткасы болып тіркелген Т.Скатов ширек финалда рейтингіде 675-орында тұрған Беларусь өкілі Даниил Остапенковпен кездесті.
Қарсыласының рейтингіде төмен тұрғанына қарамастан, матч өте тартысты өтті. Бірінші партияда Д.Остапенков тай-брейкте сәтті ойнады – 7:6 (7:4). Екіншісінде қазақстандық теннисші есе қайырды – 7:6 (7:5). Үшінші, шешуші сетті Тимофей жеңіспен түйіндей білді – 6:4.
Үш сағат 21 минутқа созылған бәсекеде Скатов 2 эйспен бірге 7 брейк-пойнттың төртеуін өз есебіне жазды. Остапенков 12 эйс, 3 брейкпен (10 брейк-пойнт) ерекшеленді.
Тимофей Скатов финалға шығу үшін рейтингіде 325-сатыдағы франциялық Антуан Гибодомен таласады.
Еске сала кетейік, бұдан бұрын Мадрид турнирінде Юлия Путинцеваның тартысты бәсекеде 19 жастағы теннисшіні жеңгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).