АСТАНА. KAZINFORM — Қазақстандық, әлемнің 209-ракеткасы Тимофей Скатов Бостад (Швеция) АТР 250 турнирінің іріктеу сайысын сәтті бастады.
Іріктеу додасында 7-ракетка болып тіркелген қазақстандық теннисші дүниежүзілік рейтингіде 296-орында тұрған үндістандық Сумит Нагалмен бетпе-бет келді.
Бір сағат 26 минутқа созылған бәсекеде Скатов 6:2, 6:4 есебімен жеңіске жетті. Ол эйс жасамағанымен, 8 брейк-пойнттың тең жартысын өз есебіне жазды. Нагал 4 эйс, 1 брейкпен (2 брейк-пойнт) ерекшеленді.
Тимофей Скатов іріктеу сайысының финалында әлемнің 139-ракеткасы, италиялық Андреа Пеллегриномен кездеседі. Оны ұтқан жағдайда негізгі турнирге өтеді.
Еске сала кетейік, бұдан бұрын Зарина Диястың Португалиядағы жарысты жеңіспен бастағанын жазған едік.
Сондай-ақ Гамбург турнирінде Жібек Құламбаева іріктеу сайысының финалына шықты.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).